Dokter Deng Wewene

Utu adalah panggilan kesayangan laki-laki suku Minahasa, di Sulawesi Utara.  Mar Utu punya nama resmi yang tatulis di akte kelahiran, entah for data penduduk, sekolah, sampe kemungkinan jatah raskin.  Namanya Michael Luntungan.  Mahasiswa semester awal Fakultas Perikanan.

ilustrasi gbr dari google

Utu pe papa karyawan swasta di pabrik ikang blek di Bitung.  Depe mama bajual sayor deng barito di pasar.

Ungke panggilan kesayangan laki-laki Sangihe, Kepulauan Sangihe Talaud.  Nama lengkapnya Abraham Hengkengbala.  Mahasiswa kedokteran semester akhir.

Dorang batemang dari SD.  Waktu itu Ungke pe papa dapa tugas di Minahasa sebagai Kepala Pertanahan. Ungke pe mama guru SMP.

Kalo Michael pe model burako, sampuraga deng sadiki kasar, Abraham depe tabebale.  Santun, rapi deng berwibawa. Sala-sala calon dokter katu.

Michael suka sekali cari hal deng bakalae, Abraham tukang sepisah.

Nintau kiapa dorang dua cocok, yang pasti dorang sering bakubawa.  Dorang selalu baku cari.

Mar dorang punya satu kesamaan: sama-sama suka music, biarpun beda warna.  Michael pecinta hard rock model Jaja Miharja, eh,…sory, maksudnya Nirvana, Led Zeppelin, Guns N Roses, Aerosmith, Scorpions, dll.  Abraham pecinta Jazz.

Biarpun Michael so pernah bertapa 3 malam di gua Kawangkoan for bekeng bagus depe performa suara, tetap dapa sayang forever.  Dorang nya pernah pangge pa Michael tiap ada vocal grup ato paduan suara di Gereja.   Dorang bilang cuma bekeng stress pemain gitar.  Pernah satu pemain gitar riki opname,…lantaran tasetrom listrik kasiang, bukan lantaran Michael pe suara.

Biar sampuraga, masih ada depe sisi bagus pa Michael: tau diri.  Lantaran dia tau depe suara mentok, dia setajam depe ketrampilan ba music.  Berbulan-bulan, sampe 6 taong, dan akhirnya jago skali satu alat music, yakni rebana.  Alat music yang jadi andalannya Ariel Noah.

Saking depe jago, Michael bisa ngiringin lagu Bohemian Rapsody,-lagunya Queen yang legendaris, trus matian-matian basuruh pa Abraham yang jago skali internet, buat ngaplot di Youtube.  Sukses di tonton 15 x, yang semuanya Michael sih,…hehehe. Pe cupu skali do, lagu Bohemian Rapsody pake rebana.

--------------------ooo---------------

Sadiki aneh memang kalo mopikir kiapa dorang dua cocok.  Mar dong dua punya daya tarik yang beda.  Michael budo, Abraham itang manis.  And mungkin lantaran kalakuan, dong dua ley punya selera yang bertolak belakang soal cewe.  Abraham tagila-gila pa wewene yang dapa lia burako, sampuraga, deng talamburang model kendall Jenner.

For Abraham, wewene burako deng sampuraga dapa lia exotis skali.  Ada gejolak jiwa yang dinamis dibalik tatapan sinis.  “Menantang sekali for direngkuh dalam pelukan.”  Begitu dia bilang satu kali deng bahasa gado-gado.

Itu sebabnya dia pe mata rasa-rasa mo balumpa tiap lia gambar Kendall Jenner, atau Nova Elisa.

Depe tabebale komaling deng Michael.  Dia paling suka sekali wewene yang kalem, gemulai and anggun.  Makanya dia amper manangis waktu Kate Midlleton merit sama pengeran William.

“Rasa-rasa kita motumbu tu William besay tudia..” Michael sesandar depe palungku padepe oma pe TV layar datar waktu setunjung prosesi pernikahan William and Kate di istana Kerajaan Inggris.

Woooyyy,…bakaca ngana Utu, ada puluh juta wewene datunggu pa William.  Raja Inggris dia kalo ngana tau.  Bukang Eki,-tukang potong boke’- yang depe cewek langsung kase bibir pa ngana lantaran cuma rabu-rabu ngana rayu di dego-dego.

-----------------ooo---------------

Ngomongin cewek, rasanya lebe afdol waktu muda.  Waktu belom punya ikatan, and komitmen.  Bebas batona deng sebanyak mungkin cewek, ato cowok.  Yang penting tau ator.  Senin deng sapa, selasa sapa, sampe Minggu.  Kong musti inga bae-bae dorang pe kebiasaan-kebiasaan.  Apalagi nama.  Yah, bisa tabolengkar samua kalo sampe salah cumu nama.  Kalo katu Chyntia kong ngana pangge Polandia,…hehehe,…depe ibukota jo so beda. Wkwkwk.

Depe masalah, nyanda banya cowo ato cewe yang  punya koleksi pede sebanyak koleksi sepatu mba Syahrini, ato mobil sport om pengacara,-si Hotman Paris.  Kan pede punya kaitan erat sama jam terbang, alias jam bagombal.  Depe teori, makin sering torang bagombal, makin pede.

Cotarukira om-om yang so punya anak 2, ato 3.  Dorang jaoh lebe jago bekeng wewene pe hati melayang-layang sama deng palinggir, ato burung wallet.  So itu banyak cewe bilang bagini: kiapa pria menarik selalu so punya istri ?

Banyak laki-laki salah menilai wewene.  Dorang bilang wewene-wewene  sekarang matrealistis.  Kong dorang bakuat cari wewene yang nyanda matrealistis.  Susah stou kang.  Lantaran cara bapikir laki-laki deng wewene settingannya gak sama.  Torang pe susunan otak serupa mar beda.  Makanya salah kalo bapikir wewene-wewene itu matrealistis.  Itu sudut pandang laki-laki. 

 

Bukan wewenenya yang matrealistis.  Dorang justru realistis kalo bicara soal kekayaan.  Depe bahasa Tombulu: 'they need quarantee'  Dorang butuh jaminan katu.  Entah jaminan kestabilan, ato kenyamanan.  Stabil deng nyaman for dia deng anak-anak.  And dorang pe susunan otak menyimpulkan kalo kekayaan-lah jaminan kestabilan dan kenyamanan yang paling mungkin di dapat.

Amper sebagian besar wewene pernah bapikir bagaimana kalo laki-laki setinggal.  Entah lantaran mati, atau,..yah,..tau toh.  banyak wewene sadar kalo banyak laki-laki yang nda puas cuma makang-makang daging ayam. “Sesekali suka ikang garang”

Siapa kwa nintau cirita di mana-mana soal laki-laki yang biar so kaya, terhormat, punya maitua  pasuhung sama deng di dunia kahyangan, toh masih suka rabaraba depe prt, sekretaris, ato pengasuh anak.  Banyak kwa di koran-koran.

Makanya cowo-cowo musti trima kenyataan kalo ngoni pe wewene balingkar ke lain hati yang lebe kaya, biarpun depe face 2 level di bawah.  Toh face juga bisa di upgrade kwa.  800 juta bisa reparasi idong, dagu, deng kening di Paris, Jerman, atau Melbourne. 

 

Mar biar ley cowo fasuhung sama deng Zac Efron, Ashton Kutcher, ato Keanu Reeves, kalo setunjung gejala kere abadi, jang sesalah wewene katu. "Lebe bae face sak semen, mar doi sagunung klabat"  

Makanya musti bisa kase quarantee.  Sekarang ngana kere, mar punya potensi besar for jadi sama deng Gober bebek yang batobo di emas batangan.  Mungkin wewene mau basabar 5 sampe 10 taong di sei pa ngana basiksa-siksa sama deng tu lagu: ‘biar ku makan cuma deng nasi deng garang, biar kutidur, beralas tikar jerami’ (hehehe,…hoax,…lagu seno.  Coba jo…kang Usi ?

------------------ooo--------------

Biarpun mahasiswa senior, kadang-kadang dia suka pusing mangada Michael pe abal-abal.  Sama deng satu kali pas dorang dabcrita.

“Ngke, ngoni dokter pe sadap kang.  Gagah, pande, banya doi.  Kong, boleh jaga pegang sambarang parampuang gratis.” Michael senyum kurang ajar.

“Masa katu mopegang parampuang gratis. Kage dapa lap gratis ley” Abraham tetap kalem, biarpun depe kening bakerut.

“Heh, ngoni dokter kan kalo baperiksa pasien musti jaga pegang.  Biar tangan tu saki, kalo ngoni suruh buka baju, tatap pasien iko….hehehe” Micahel polote tatawa, kong dia sambung.

“Coba torang, mosuru parampuang buka baju.  Kalo belom batona lama, susah kasiang. Kage dong lapor polisi  Mar ngoni dokter-dokter, pe sampe langsung suru buka baju, pegang sana-sini, abis itu dorang bayar ley….pantas katu banya’ laki-laki suka jadi dokter…wkwkwk” Michael tatawa riki konto.

Abraham cuma senyum elegant.  Biar dapa dengar kurang ajar, mar ada depe betul jo Michael dabilang.  Walau dia katu bukang itu depe tujuan masuk kedokteran.

 

(Ngga semua yg loe baca itu bener. Krn kadang, 'Fun' adalah pelajaran berbeda soal bener, and ngga,...hehehe) 

 

ketika pesta usai, dan lampu-lampu di padamkan,

kita tanggalkan jubah, alas kaki, dan riasan wajah 

menuju pembaringan

tempat paling jujur yang bercerita jati diri kita

melepaskan beribu gundah dan penat

berenang dalam alam mimpi

mimpi satu warna

karena mimpi hanya berwarna kelabu 

kiranya mimpimu indah

walau kelabu

 

 

sampe sini jo dulu.  Nanti sambung berikut.