For
Utu wewene selalu jadi misteri yang nda pernah dia bisa selami (walau dia jago
skali batobo). Depe contoh Wiwi, cewek super
fasuhung deng anggun momampos yang slalu
bekeng utu grogi tiap baku dapa di perempatan, yang sebenarnya malah nda tamaso
di daftar 25 cewek yang siap Utu bagombal akang for jadi ‘yang utama’ ato
cadangan, malah tanpa malo, cari-cari perhatian pa Utu.
Btw,
kita mo cirita sadiki soal daftar 25 cewek yang Utu ketik, kong tempel pa depe blakang lamari baju plastic di
tampa kost. Nama-nama 25 cewek yang depe
kriteria sbb: cantik, licing, anggun, lembut, keibuan, tinggi max-min 177 cm-150
cm, (soalnya kalo kurang dari 120 cm, dia tako orang kira sementara bembeng cakalang
fufu), bukan dari keluarga super tajir, bukan ban itam Jiujitsu, bukan anak
Jendral, nyanda hobi makang lalar, caca, meong, tikus, and waras tantu.
Pernah
satu kali Ungke batanya soal kriteria tinggi. “Kiapa so kalo tu cewek pe tinggi lebe dari 177 cm ?”
“Heh, kalo dia 180 cm, kong pake high heels 6
cm, kan berarti torang pe selisih 11 cm, lantaran atiq cuma 175 cm. Keode, bisa ciri atiq pe wibawa mo bajalang
deng dia. Kage orang kira kita depe tukang
angka barang,…hehe” Utu senyum
sambil buang depe puntung roko.
“Kong
soal tu nyanda makang lalar, caca, meong, deng tikus ? Kan banya cewe Minahasa
yang doyan Meong, deng Tikus,..kalo lalar deng caca kwa so kurang ngana pe seno
toh, masa ley mo makang lalar deng caca….” Ungke lanjut depe introgasi sambil
tatatawa.
“Seno stou, kan ngana tau sandiri atiq alergi
momampos deng tu menu tu dia. Bisa ferlameng
kage kita kalo bakumangada deng cewe yang doyan Meong deng Tikus.” Utu pe
muka sobatahang munta.
“Kalo
soal keluarga super tajir dang, bukannya malah banyak cowok yang suka sekali mo
batona deng cewek super tajir ? Ha, kita baru tau kalo ngana ternyata
rendah diri,..ato pura-pura kage” Ungke sadiki curiga deng Utu.
“Ungke,
sebagai orang berpendidikan tinggi, ngana pasti paham apa tu sepadan ?”
“Sepadan
dan Ligitan ngana pe maksud ?” Ungke bagara.
“Keode
setang, itu pulau yang hilang lantaran birman da bekeng bodok…” Utu tola pa
Ungke sampe tasiguju.
“Huahahaha,…iyo,..iyo,
kita paham”
“Biar kata atiq cowo bagini, mar atiq tau
mana bumi, mana langit. Atiq tau kalo
bumi deng langit bakudapa, itu kiamat. Bukan
soal rendah diri, ato matre deng bukang.” Utu kase penjelasan yang bikin
Ungke senyum kagum pa tu cowok seno. Sampe-sampe
Ungke lia kiri-kanan, kage dia sementara bacirita deng setang gumutu yang
bermetamorphosis.
“Kong bagemana deng tu bukang ban itam
Jiujitsu dang ?”
“Ngke, atiq pe hobi salah satu bauni tu acara
UFC, perkelahian bebas yang sampe pica, babadarah, deng pata-pata. Noh, kebanyakan depe juara, pemegang ban itam
Jiujitsu. Tu ilmu beladiri dapa tako
asal Brazil. Noh ngana bayangkan kalo
atiq batona deng cewek ban itam Jiujitsu, nyanda minta mo bakalae, mar kalo dia
sampe nae dara deng tape kalakuan, hehehe,…nyanda mo jadi weris goreng sous
kita, sudah jo kita, mar kalo ada wewene laeng yang dia cemburu akang kasiang….”
“Boleh jo ngana Tu, biar sadiki meng-meng,
mar ngana tetap perduli pa orang laeng yang so rencana ngana mo bekeng suka”
Ungke basindir alus.
Oke
coy, torang bale ke cirita Wiwi….Nama Lengkapnya Monica Rhawina Simangunsong. cewek semester awal Fakultas Sastra Rusia,
yang aslinya dari desa Serei, Likupang,….wkwkwk,…nyanda kaleeee, Simangunsong
ya dari Samosir, Tanah Batak dong ah,….(makanya sering-sering baca buku Geologi
ato notasi not balok)
Tadinya
Utu pikir di talalu geer waktu lia Wiwi pe gelagat bacari-cari perhatian. Mar depe insting pemburu akhirnya meyakini
kalo dia nyanda salah. Wiwi, cewek super
fasuhung deng anggun momampos yang nyanda ada di daftar 25 cewek buruannya,
ternyata minta di buru secara terang-terangan.
And sebagai cowok, jelas fenomena tudia bekeng Utu pe dada mo pica
lantaran talalu bangka (Bangka Belitung stouuuu…hehe). Dia so melayang ke awan cumullus nimbus yang
banyak bekeng pesawat turbulensi.
Di
tengah euphoria, Utu dengan serta merta melupakan 25 sosok dalam daftar di
balik lemari baju palstik. Secara matematis,
98,01%, dan tinggal masalah waktu, Wiwi bakal masuk dalam pelukan, dekapan, dan
kuluman sang Utu, alias Michael Luntungan.
Ajaibnya,
lagu pilihan yang Utu nyanyi akang hari-hari bukannya ‘You Make My World So Colourfull’-nya Daniel Lapian,..eh, Daniel
Sahuleka maksudnya (Daniel Lapian kote atiq pe tamang SMP,…hehehe), eh malah ‘Cinderella’-nya Grup band Radja.
Ada
sebuah kisah tentang dara jelita
Hidup slalu penuh dera dan siksa
Datang sebuah berita tentang adanya pesta pangeran mencari
permaisurinya
Cinderella pun tiba dengan kereta kencana sepatu kaca hiasi
kakinya
Semua
mata terpana akan kedatangannya pangeran jatuh cinta padanya
Waktu terus berganti dentang jam pun berbunyi
Cinderella pergi Cinderella Cinderella
………………………….
Ih,
pe nda cocok do….
Btw,
nanti seterus neh,..atiq pe roko so abis,…wkwkwk,…bakusedu katu. Tantu kalo atiq dapa ide.
No comments:
Post a Comment